Նախագահ Քոչարյանի ապօրինի կալանքի որոշման տակ կան կոնկրետ անուններ․ նախազգուշացում՝ պատասխանատվության պահը կգա շատ անսպասելի․ Միկոյան

«Արցախի և Հայաստանի նախագահ Ռոբերտ Քոչարյանի ապօրինի քրեական հետապնդումը մինչև չդադարեցվի, Հայաստանում քաղաքական կյանքի բնականոն  ընթացքի մասին խոսելը կլինի ավելորդ շռայլություն»,-ասուլիսում ասաց ՀՀ երկրորդ նախագահ Ռոբերտ Քոչարյանի գրասենյակի ղեկավար Բագրատ Միկոյանը։

Նա նշեց, որ Ռոբերտ Քոչարյանը մշտապես ՊՊԾ աշխատակիցների հսկողության տակ է, նրանց ուղեկցությամբ է տեղաշարժն ապահովվել. «Նախագահի բնակության վայրը պահպանում է ՊՊԾ աշխատակիցների կողմից։ Եթե որևէ հյուր նախագահի տան մուտքից մտնում է, մինչև նախագահին հանդիպելը, Նիկոլ Փաշինյանն ու պատկան մարմինները գիտեն՝ ով է այդ մարդը։ Այս պայմաններում նախագահին  պարտադիր կալանավորելը ևս մեկ անգամ ապացուցում է, որ սրա պատվերը եղել է կողքի պետությունից, կատարողները հայկական անուն-ազգանունով մարդիկ են։ Բաքվի բանտում մենք չունենք հայր և որդի, Բաքվի բանտի երևանյան ֆիլյալում ունենք հայր և որդի։ Ժամանակն է կատարողները մի պահ սթափվեն ու մտածեն՝ ինչ են կատարում»,-նշեց Միկոյանը։