Հանտավիրուսի բռնկումն ավարտվել է․ ԱՀԿ

Առողջապահության համաշխարհային կազմակերպության (ԱՀԿ) գլխավոր տնօրեն Թեդրոս Ադհանոմ Ղեբրեյեսուսը հայտարարել է, որ Hondius զբոսանավի վրա հանտավիրուսի բռնկումն ավարտվել է։

Ինչպես գրում է BBC News-ը, նավի վերջին ուղևորը, որը շփվել էր վարակվածների հետ, ավարտել է կարանտինը, թեստի պատասխանը բացասական է եղել, նա վերադարձել է տուն։

Մայիսի 25-ից ի վեր նոր դեպքեր չեն գրանցվել։

Հիշեցնենք, որ հանտավիրուսի բռնկումը տեղի էր ունեցել շրջագայության դուրս եկած Hondius զբոսանավի վրա ապրիլ-մայիս ամիսներին՝ Ատլանտյան օվկիանոսում։

Հանտավիրուսը փոխանցվում է կրծողների միջոցով։ ԱՀԿ տվյալներով՝ աշխարհում ամեն տարի գրանցվում է հանտավիրուսով վարակման շուրջ 10 հազարից 100 հազար դեպք, իսկ հիվանդության ծանր ընթացքը կախված է վիրուսի շտամից։