Ռուսաստանը Կիևի բնակիչներին և օտարերկրյա դիվանագետներին զգուշացրել է սպասվող գրոհի մասին

Ուկրաինայի զինված ուժերի կողմից Ռուսաստանի քաղաքացիական բնակչության վրա հարձակումներին ի պատասխան՝ ռուսական բանակը հարվածներ կհասցնի Կիևում տեղակայված ռազմարդյունաբերական կենտրոններին։ Այս մասին հայտարարություն է տարածել Ռուսաստանի արտգործնախարարությունը։

«Ռուսաստանի զինված ուժերը սկսում են հարվածներ հասցնել Կիևում գտնվող Ուկրաինայի ռազմարդյունաբերական համալիրի ձեռնարկություններին, այդ թվում՝ կոնկրետ կետերին, որտեղ նախագծվում, արտադրվում, ծրագրավորվում և օգտագործման են պատրաստվում անօդաչու թռչող սարքեր, որոնք ՆԱՏՕ-ի մասնագետների աջակցությամբ՝ Կիևի ռեժիմը կիրառում է հետախուզական տվյալների ձեռքբերման և թիրախավորման ապահովման նպատակով»,- ասվում է գերատեսչության հայտարարության մեջ։։

Հաշվի առնելով այն հանգամանքը, որ նշված կետերը տեղակայված են Ուկրաինայի մայրաքաղաք Կիևում, ՌԴ ԱԳՆ-ն այնտեղ գտնվող օտարերկրյա դիվանագետներին ու միջազգային կառույցների ներկայացուցիչներին կոչ է արել լքել Ուկրաինայի մայրաքաղաքը, իսկ տեղի բնակչությանը՝ հնարավորինս հեռու մնալ ռազմական  ենթակառուցվածքներից։