«Նիկոլ, թշնամի»․ տասնյակ մարդիկ բողոքի ակցիա են անում ՌԴ-ում ՀՀ դեսպանության մոտ

«Նիկոլ, դավաճան», «Նիկոլ, թշնամի»․ այս վանկարկումներով Մոսկվայում տասնյակ մարդիկ բողոքի ակցիա են կազմակերպել ՌԴ-ում ՀՀ դեսպանատան մոտ։ Տեղեկությունը հայտնում են ռուսական տելեգրամյան ալիքները։ Բողոքի ակցիայի պատճառը Հայ առաքելական եկեղեցու դեմ արշավն է, Շիրակի թեմի առաջնորդ Միքայել արքեպիսկոպոս Աջապահյանի և Բագրատ արքեպիսկոպոս Գալստանյանի ազատազրկումը, ինչպես նաև Միքայել սրբազանի նկատմամբ արդեն իսկ կայացված մեղադրական վերդիկտը։

«Աղոթում ենք, որ Աստված պահպանի և անսասան պահի Միքայել և Բագրատ արքեպիսկոպոսներին, ազգային բարերար Սամվել Կարապետյանին, ինչպես նաև բոլոր նրանց, ովքեր ապօրինի ազատազրկված են»,- իր խոսքում ասել է բողոքի ակցիայի մասնակից հոգևորականներից մեկը։

Հիշեցնենք՝ Փաշինյանն այսօր աշխատանքային այցով մեկնել է Ռուսաստանի Դաշնության մայրաքաղաք Մոսկվա, որտեղ կմասնակցի «Համաշխարհային ատոմային շաբաթ» խորագրով համաժողովին: