Գերմանիան դադարեցրել է Վրաստանին՝ 237 մլն եվրո ծավալով տրամադրվող ֆինանսական օգնությունը

Գերմանիան դադարեցրել է 237 միլիոն եվրո ծավալով Վրաստանին տրամադրվող ֆինանսական օգնությունը՝ նախատեսված տարբեր նախագծերի համար, հայտարարել է Գերմանիայի դեսպան Պետեր Ֆիշերը։

Խոսքը կանաչ ջրածնի, էներգետիկ նախագծերի, ինչպես նաև Բաթումի ջրային ենթակառուցվածքների ֆինանսավորման մասին է։ Գերմանիայի իշխանությունների նման որոշման պատճառը «Վրաստանի շեղումն է դեպի ԵՄ ուղուց», գրում է «Սպուտնիկ» գործակալության վրացական ծառայաությունը։

Միաժամանակ երկիրը կշարունակի աջակցել վրացական հասարակական կազմակերպություններին, ասել է դեսպանը։

Վրաստանի վարչապետ Իրակլի Կոբախիձեն նոյեմբերի 28-ին հայտարարել է, որ իշխող «Վրացական երազանք՝ ժողովրդավարական Վրաստան» կուսակցությունը որոշել է մինչև 2028 թվականի վերջ օրակարգ չներառել Եվրամիությանն անդամակցելու շուրջ բանակցությունների հարցը և հրաժարվել ԵՄ բոլոր բյուջետային դրամաշնորհներից։