Մեր հանդիպումը չափազանց արդյունավետ էր և կառուցողական. Չավուշօղլուն մեկնաբանել է Միրզոյանի հետ հանդիպումը

«Շնորհակալ եմ Հայաստանի արտաքին գործերի նախարար Արարատ Միրզոյանին մեր հրավերն ընդունելու և Անթալիայում դիվանագիտական ֆորումին մասնակցելու համար»։ Այս մասին հայ գործընկերոջ հետ հանդիպումից հետո լրագրողներին ասել է Թուրքիայի արտգործնախարար Մևլութ Չավուշօղլուն։

«Մեր հանդիպումը չափազանց արդյունավետ էր և կառուցողական։ Նախագահ Էրդողանի և վարչապետ Փաշինյանի դրական ուղերձներից հետո սկսվեց հարաբերությունների կարգավորման գործընթացը։ Հատուկ ներկայացուցիչներ նշանակվեցին և երկու անգամ հանդիպեցին՝ Մոսկվայում և Վիեննայում։ Նրանք քննարկում են հարաբերությունների լիարժեք կարգավորմանն ուղղված քայլերը։ Այսօր մենք նաև սա ենք քննարկել»,- ասել է թուրք նախարարը։