ԱՄՆ-ը կշարունակի ռազմական օգնություն տրամադրել Իսրայելին. Սպիտակ տուն

ԱՄՆ-ը չի պատրաստվում փոխել Իսրայելին ռազմական օգնություն ցուցաբերելու ծրագրերը Մերձավոր Արևելքում հակամարտության ներկայիս փուլի պատճառով: Այս մասին լրագրողներին հայտնել է Սպիտակ տան մամուլի քարտուղար Ջեն Փսակին:

«Մենք չենք նախատեսում փոխել անվտանգությանն ուղղված օգնությունը, որը տրամադրում ենք Իսրայելին», - Սպիտակ տան խոսնակի խոսքերն է մեջբերում ՏԱՍՍ-ը:

Ըստ նրա՝ միևնույն ժամանակ, Վաշինգտոնը մտադիր է շարունակել «դիվանագիտական փոխգործակցությունը տարածաշրջանի ղեկավարների հետ», այդ թվում՝ Իսրայելի, Պաղեստինի և Եգիպտոսի ներկայացուցիչների:

ԱՄՆ-ը հաստատուն հավաստիացումներ է ստացել այն մասին, որ իսրայելցիների և պաղեստինցիների միջև արյունահեղության ներկայիս փուլը ավարտված է: «Մենք շահագրգիռ կողմերից ամուր հավաստիացում ունենք, որ նրանք հավատարիմ են հրադադարի ռեժիմին: Իհարկե, մենք դրան շատ ուշադիր կհետևենք առաջիկա օրերին», - ասել է Սպիտակ տան խոսնակը: