Թուրքիան դարձել է պայթուցիկ նյութերի արտադրության առաջատարը. Էրդողան

Թուրքիան մտել է  նոր սերնդի պայթուցիկ նյութեր արտադրողների «բարձրագույն լիգա»: Այս մասին Թուրքիայի նախագահ Ռեջեփ Թայիփ Էրդողանն ասել է MKEK պաշտպանական ընկերության ներքո գործող Barutsan ձեռնարկության բազայի վրա էներգետիկ նյութերի գործարանի բացման արարողության ժամանակ. հաղորդում է Anadolu-ն:

«Այս գործարանի շնորհիվ մեր երկիրը բարձրագույն լիգա է դուրս եկել նոր սերնդի պայթուցիկ նյութերի արտադրության ոլորտում»,- ասել է Թուրքիայի ղեկավարը՝ մասնավորապես ավելացնելով, որ փոշիացված մոդուլային համակարգերը, որոնք Թուրքիան նախկինում ներմուծել է, այժմ նույնպես կարտադրվեն երկրի տարածքում:

Նրա խոսքով՝ Թուրքիան այլևս կախված չի լինի արտաքին մատակարարումներից՝ իր զինված ուժերին ռումբեր, զինամթերք, հրթիռներ կամ մարտագլխիկներ տրամադրելու տեսանկյունից:

«Վերջին իրադարձությունները, ինչպես նաև մեզ վրա կիրառված բացահայտ և թաքուն էմբարգոները, մեր երկրում ստեղծել են այդպիսի կարևոր արտադրանքի կարիքը»,- բացատրել է Էրդողանը:

Երկրի ղեկավարի խոսքով՝ իշխանությունները մտադիր են արագորեն վերափոխել Թուրքիայի Մեխանիկական և քիմիական արդյունաբերության ինստիտուտը մի կառույցի, որը, մասնավոր հատվածի հետ սերտ համագործակցությամբ, կբավարարի թուրքական բանակի բոլոր կարիքները: