Թուրքիայի ԱԳՆ-ն հայտարարել է, որ ողջունում է «Ղրիմի պլատֆորմ» ստեղծելու՝ Ուկրաինայի նախաձեռնությունը

Թուրքիան ողջունում է Ղրիմի հարցերով բանակցային հարթակ ստեղծելու՝ Ուկրաինայի նախաձեռնությունը: Այս մասին հայտարարել է Թուրքիայի արտգործնախարար Մևլյութ Չավուշօղլուն՝ իր ուկրաինացի գործընկեր Դմիտրի Կուլեբայի հետ Անկարայում կայացած բանակցություններից հետո:

«Մենք կշարունակենք ամրապնդել մեր հարաբերությունները, հատկապես՝ ռազմական համագործակցության և պաշտպանական արդյունաբերության ոլորտներում: Մենք ողջունում ենք Ղրիմի պլատֆորմը ստեղծելու նախաձեռնությունը»,- գրել է քաղաքական գործիչը Twitter-ում:

Ուկրաինայի իշխանություններն ավելի վաղ հայտարարել էին «Ղրիմի պլատֆորմ» ձևաչափի ստեղծման մասին`Ղրիմը Ուկրաինային վերադարձնելուն և թերակղզու բնակիչների իրավունքները պաշտպանելուն ուղղված միջազգային ջանքերը համակարգելու նպատակով. ըստ Կիևի՝ թերակղզու բնակիչները հետապնդման են ենթարկվում: Ուկրաինայի նախագահ Վլադիմիր Զելենսկին բազմիցս հայտարարել է, որ այս նախաձեռնությունը քննարկել է Եվրամիության, Մեծ Բրիտանիայի, Կանադայի, Թուրքիայի և այլ գործընկերների ներկայացուցիչների հետ, և պնդում է, որ «նրանցից շատերը պատրաստ են անդամակցել և ակտիվորեն մասնակցել դրան»: