Իդլիբում ռուսական հարվածների արդյունքում սպանվել են տասնյակ թուրքամետ գրոհայիններ

Նոյեմբերի 2-ին Սիրիայի հյուսիս-արևմուտքում «զինված ընդդիմության» հենակետի վրա  ավիահարվածի հետևանքով ոչնչացվել է Թուրքիայի աջակցությունը վայելող առնվազն 35 գրոհային: Այս մասին հայտնում է բրիտանական The Telegraph թերթը՝ հղում անելով տեղական աղբյուրներին և արտասահմանյան դիտորդական կազմակերպություններին:

Նշվում է, որ դա ամենամահացու հարձակումներից մեկն է գրեթե ութ ամիս առաջ Իդլիբում հրադադարի հաստատումից ի վեր:

Սիրիայի զինված ընդդիմության խոսնակ Յուսեֆ Համուդն ասել է, որ հարձակման նպատակը թուրքամետ «Ֆայլաք ալ Շամ» խմբավորման ուսումնական ճամբարներն են հյուսիս-արևմուտքում գտնվող Իդլիբում՝ Սիրիայի՝ ապստամբների կողմից վերահսկվող վերջին նահանգում։

Հայտնի է, որ վերոնշյալ ազդեցիկ ահաբեկչական կազմակերպությունը զբաղվում է ահաբեկիչ–վարձկանների հավաքագրմամբ։