Ադրբեջանի կողմից խաղաղ բնակչության թիրախավորումը հանգեցնում է հումանիտար մեծ աղետի. դեսպան Հովակիմյան

Դեսպան Աշոտ Հովակիմյանը հարցազրույց է տվել Չեռնոգորիայի հանրային հեռուստառադիոընկերության առավոտյան ծրագրի ուղիղ եթերում՝ հանգամանալից ներկայացնելով Ղարաբաղյան հակամարտության գոտում տիրող իրավիճակը:

Նա շեշտադրում է կատարել այն փաստի վրա, որ Ադրբեջանի զինված ուժերի կողմից Թուրքիայի աջակցությամբ և օտարերկրյա ահաբեկիչ զինյալների ներգրավմամբ Արցախի Հանրապետության դեմ ծավալվող ռազմական ագրեսիան մեծ վտանգ է հանդիսանում ոչ միայն Հայաստանի և Արցախի, այլ նաև ողջ տարածաշրջանի համար և նույնիսկ՝ դրա սահմաններից դուրս գտնվող երկրների համար։

Դեսպան Հովակիմյանը նաև ընդգծել է, որ ադրբեջանական կողմը միտումնավոր թիրախավորում է խաղաղ բնակչությանը և քաղաքային ենթակառուցվածքները, ինչը հանգեցնում է հումանիտար մեծ աղետի։ Նշվել է նաև, որ խաղաղ բնակչության դեմ արգելված կասետային զենքերի օգտագործումը միջազգային հումանիտար իրավունքի կոպտագույն խախտում է։