ԱՄՆ զորքերը ստիպված կլինեն լքել Իրաքը և Սիրիան. Իրանի հոգևոր առաջնորդ

ԱՄՆ ուժերը ստիպված կլինեն լքել Իրաքն ու Սիրիան. այս մասին գրում է ՏԱՍՍ-ը՝ երկրի հոգևոր առաջնորդ և ղեկավար Ալի Խամենեի խոսքերին հղումով։

Նա, մասնավորապես, նշել է. «Ամերիկացիները բացահայտ հայտարարում են, որ իրենց ռազմական ուժերը տեղակայված են Սիրիայում, քանի որ այնտեղ նավթ կա: Իհարկե, նրանք չեն մնա եւ՛ Սիրիայում, եւ՛ Իրաքում», ու հավելել. «Նրանք պետք է հեռանան [այս երկրներից], եւ նրանց անկասկած կստիպեն անել դա»:

Ըստ Խամենեի՝  «չնայած հսկայական միջոցներին, որոնք ամերիկացիները տարիների շարունակ հատկացրել են դրական կերպար ստեղծելու համար, այսօր Միացյալ Նահանգներին՝ և երկիրը և ռեժիմը, ատում է աշխարհի զգալի մասը»:

Հիշեցնենք՝ ԱՄՆ զինված ուժերի սահմանափակ զորակազմը Սիրիայում է գտնվում 2015 թվականից: Իրաքում ամերիկյան զորքերը տարբեր առաջադրանքներ են կատարում 2003 թվականի զինված հակամարտությունից ի վեր: