Հայոց ցեղասպանության 105-րդ տարելիցի հիշատակի արարողությունները Ֆրանսիայում անցկացվել են մեկուսացման բացառիկ պայմաններում

2020թ. Հայոց ցեղասպանության 105-րդ տարելիցի հիշատակի արարողությունները Ֆրանսիայում անցկացվում են մեկուսացման բացառիկ պայմաններում՝ Ֆրանսիայում հայտարարված սանիտարական արտակարգ դրության պատճառով: Այս մասին հայտնում են Ֆրանսիայում ՀՀ դեսպանությունից:

Ապրիլի 24-ին Փարիզում՝ Կոմիտասի հուշարձանի մոտ, տեղի ունեցավ հիշատակի արարողություն, որին մասնակցեցին Ֆրանսիայի արդարադատության նախարար Նիկոլ Բելուբեն, Ֆրանսիայում ՀՀ դեսպան Հասմիկ Տոլմաջյանը, Փարիզի քաղաքապետ Անն Իդալգոն, Ֆրանսահայ կազմակերպությունների համակարգող խորհրդի համանախագահներ Արա Թորանյանը և Մուրադ Փափազյանը:

Նույն օրը ոչ բազմամարդ հիշատակի արարողություններ են կազմակերպվել Ֆրանսիայի բազմաթիվ քաղաքներում: Հեռահար կարգով՝ Հայոց ցեղասպանության 105-րդ տարեդարձին նվիրված՝ հարյուրավոր ուղերձներ են հղել Ֆրանսիայի քաղաքների քաղաքապետեր, Ֆրանսիայի Ազգային ժողովի պատգամավորներ և սենատորներ, հայ ժողովրդի բազմաթիվ բարեկամներ։