Վրաստանի իշխանությունն ու ընդդիմությունը կրկին չեն հասել համաձայնության

Վրաստանում երեկ տեղի ունեցած բանակցությունների երրորդ փուլում իշխանությունն ու ընդդիմությունը բազմամանդատ ընտրական շրջանների վերաբերյալ համաձայնության չեն հասել: Այս մասին հանդիպման ավարտից հետո հայտարարել է Վրաստանի խորհրդարանի խոսնակ Արչիլ Թալակվաձեն. ըստ Yerkir.am-ի՝ գրում է Ալիք Մեդիան։

Թալակվաձեի խոսքով՝ իշխանության ներկայացուցիչներն ընդդիմությանը ներկայացրել են այն փաստարկները, որոնց պատճառով բազմամանդատ ընտրական շրջաններ ստեղծելու մասին նախաձեռնության իրականացումը, իշխանության կարծիքով, խնդիրներ կառաջացնի:

Ինչ վերաբերում է ընդդիմությանը, Գիորգի Վաշաձեի խոսքերով՝ հանդիպմանը հայտնի է դարձել, որ իշխանությունը նույնպես ցանկանում է ընտրակարգի փոփոխություն կատարել, սակայն կոնկրետ դիրքորոշում չի հայտնում: Իշխանությունը ժամանակ է պահանջել, որպեսզի վերջնական ձևավորի ընտրակարգի վերաբերյալ իր առաջարկությունը:

Բանակցությունների հերթական փուլը տեղի կունենա դեկտեմբերի 20-ին:

Հիշեցնենք՝ ընդդիմության և իշխող կուսակցության միջև առաջին հանդիպումը տեղի է ունեցել նոյեմբերի 30-ին, որն ավարտվել է անարդյունք, երկրորդ հանդիպումը դեկտեմբերի 8-ին էր: