Սուդանի նախկին նախագահը դատապարտվել է երկու տարվա ազատազրկման

Խարթումի դատարանը Սուդանի նախկին նախագահ Օմար ալ Բաշիրին կոռուպցիայի գործով դատապարտել է երկու տարվա ազատազրկման. ըստ yerkir.am-ի` հաղորդում է ՌԻԱ «Նովոստի»-ն:

Ռազմական դատախազության քննիչները ալ Բաշիրի տան խուզարկության ժամանակ հայտնաբերել և առգրավել էին 6 միլիոն եվրո, 351 հազար դոլար, ինչպես նաև հինգ միլիարդ սուդանի ֆունտ (մոտ 105 միլիոն դոլար): Նախկին նախագահի մոտ խոշոր չափի գումար հայտնաբերելու փաստի առթիվ նրան առաջադրվել էր «արտարժույթ ունենալու, կոռուպցիայի և անօրինական նվերների ստացման» մեղադրանք:

Սուդանում 2019 թվականի ապրիլի 11-ին քառամսյա բողոքի ակցիաներից հետո տեղի ունեցավ ռազմական հեղաշրջում: Նախագահ Օմար ալ Բաշիրը, որը 30 տարի ղեկավարում էր երկիրը, հեռացվեց իշխանությունից, իսկ ավելի ուշ կալանավորվեց: Իշխանությունը ստանձնեց բանակի կողմից ձևավորված անցումային ռազմական խորհուրդը: