ԱԺ պատգամավորն ընտրվել է ՍԾՏՀ խորհրդարանական վեհաժողովի փոխնախագահ

Սևծովյան տնտեսական համագործակցության կազմակերպության խորհրդարանական վեհաժողովի հայաստանյան պատվիրակության անդամ Անուշ Բեղլոյանն ընտրվել է վեհաժողովի փոխնախագահ. այս մասին ԱԺ-ում հրավիրված ասուլիսում հայտնեցին պատվիրակության անդամները:

Բեղլոյանը մանրամասնեց` դա  պատվիրակության մեկ տարվա քրտնաջան աշխատանքի արդյունքն է: «ՀՀ պատգամավորական ներկայացուցչության ստատուսը Սևծովյան տնտեսական համագործակցության կազմակերպությունում բարձրացվեց: Կոնսենսուսով, բոլոր երկրների ստորագրությամբ հաստատվեց իմ թեկնածությունը՝ որպես փոխնախագահ:»,- պարզաբանեց Բեղլոյանը:

Հիշեցնենք, որ Սևծովյան տնտեսական համագործակցության խորհրդարանական վեհաժողովի 54-րդ նիստը տեղի է ունեցել նոյեմբերի 19-21-ը: