Անկարայում են Իրանի և Ռուսաստանի նախագահները. սպասվում է եռակողմ հանդիպում

Թուրքիայի մայրաքաղաք Անկարայում այսօր հավաքվել են Ռուսաստանի նախագահ Վլադիմիր Պուտինը, Իրանի նախագահ Հասան Ռոհանին և Թուրքիայի նախագահ Ռեջեփ Թայիփ Էրդողանը. հայտնում է «Անադոլու» լրատվական գործակալությունը:

Հանդիպման ժամանակ քննարկվելիք հարցերի շրջանակի վերաբերյալ Թուրքիայի նախագահի մամուլի կենտրոնը հայտնել է, որ նպատակն է գնահատել Սիրիայում տեղի ունեցող զարգացումները, մասնավորապես՝ Իդլիբի առնչությամբ, ապահովել պայմաններ՝ վերջ դնելու բախումներին և հնարավորություններ ստեղծելու փախստականների կամավոր վերադարձի համար:

Նախատեսված է նաև, եռակողմ գագաթնաժողովից բացի, իրականացնել երկկողմ հանդիպումներ՝ երկկողմ հարաբերություններին և միջազգային օրակարգին առնչվող հարցեր քննարկելու նպատակով:

Թուրքիայի նախագահի կայքում հրապարակված տեղեկատվության համաձայն՝ սկզբում Էրդողանը կհանդիպի Իրանի նախագահի, այնուհետև Ռուսաստանի նախագահի հետ, իսկ տեղական ժամանակով ժամը 15:30-ին տեղի կունենա եռակողմ հանդիպումը: