Թուրքիան մեզ սադրում է. Ցիպրաս

Հունաստանի վարչապետ Ալեքսիս Ցիպրասն հունական պետական հեռուստաընկերությանը տված հարցազրույցում անդրադարձել է վերջին շրջանում հույն-թուրքական հարաբերություններում լարվածության սրմանը. հայտնում է ensonhaber.com կայքը:

Նշելով երկու երկրների հաղորդակցության միջանցքների բաց լինելու անհրաժեշտությունը` նա հայտարարել է, որ Միջերկրական ծովի արևելյան ջրային տարածքներում Թուրքիայի գործողությունները սադրիչ են: «Մենք ցանկանում ենք համաձայնության գալ, իսկ Թուրքիան հրաժարվում է, սադրիչ գործողություններով է հանդես գալիս: Թուրքիայի այս մարտավարությունը արդյունք չի տա, և օրվա վերջում դա կհասկանան»,- ասել է Ցիպրասը:

Նշենք, որ հույն-թուրքական հարաբերությունները լարվել են այն բանից հետո, երբ Թուրքիան Կիպրոսի հատուկ տնտեսական գոտի համարվող ջրերում մայիսի 4-ից սկսել էր նավթի և գազի որոնողական հորատման աշխատանքները: