Վանաձորի թատրոնի տնօրենը չի ցանկանում աշխատել խնդիրներ ստեղծող նախարարության հետ

Վանաձորի Աբելյանի անվան դրամատիկական թատրոնի տնօրեն Ագնեսա Շահնազարյանն ազատվել է թատրոնի տնօրենի պաշտոնից: Լրատվամիջոցներին նա հայտնել է, որ իր պայմանագրի ժամկետն ավարտվել է, մշակույթի նախարարությունն էլ իրեն ազատել է պաշտոնից:

Իր հետագա պաշտոնավարման մասին Շահնազարյանն ասել է, որ ցանկություն չունի շարունակելու հետագա աշխատանքն անտեղյակ մարդկանց հետ, որոնք հնարավորինս խնդիրներ են ստեղծում թատրոնի համար:

Yerkir.am-ը մշակույթի նախարարության իրավաբանական վարչության պետ Անուշ Ղազարյանից հետաքրքրվեց` ի՞նչ խնդիրների մասին է ակնարկում Ագնեսա Շահնազարյանը: Նախարարության վարչության պետը չկամեցավ մեկնաբանել թատրոնի` արդեն նախկին տնօրենի ասածը, բայցև ընդգծեց` ազատման որոշումը եղել է օրենքի տառին համապատասխան: