Շվեդիայի Վեսթերոս քաղաքում կկանգնեցվի Հայոց ցեղասպանությանը նվիրված հուշարձան

Շվեդիայի Վեսթերոս քաղաքի ավագանու անդամների` Ցեղասպանությանը նվիրված հուշարձան կանգնեցնելու կոչին դրական պատասխան է եկել. հաղորդում է gazetekarinca.com կայքը:

Նախապես այս առաջարկը չէր ընդունվել, քանի որ քաղաքային իշխանություններն իրավունք չունեն արտաքին քաղաքականության վերաբերյալ որոշումներ կայացնելու:

Պահանջը ներկայացվել է Շվեդիայի Քրիստոնեա-դեմոկրատական կուսակցության կողմից: Տարածք հատկացնելու համար կուսակցությունը դիմել էր մարդկանց և կազմակերպություններին, ինչին առաջինը պատասխանեցին եկեղեցիները: Վեսթերոսի եպիսկոպոս Մայքլ Մորգանը և Եկեղեցական խորհրդի նախագահ Յորգեն Էքլունդը շվեդական թերթում հրապարակած հոդվածներում հայտարարել էին, որ պատրաստ են եկեղեցապատկան հողերից տարածք տրամադրել հուշարձանի համար:

Հուշարձանը նվիրված է լինելու հայերի և ասորիների ցեղասպանություններին: