Էրդողանը կուզի 35 տոկոս թող վերցնի, կուզի` 55 տոկոս. Դավութօղլու

Թուրքական մամուլում լուր է շրջանառվում, թե  երկրի նախկին վարչապետ Ահմեդ Դավութօղլուն 2019 թ. մարտի 31-ի ՏԻՄ ընտրություններից հետո կհայտարարի նոր կուսակցության մասին: Նշվում է նաև, որ կուսակցությունը կբացվի սեպտեմբեր ամսին:

Sözcü լրատվականի թղթակից Վելի Թոփրաքը հայտնում է, որ նորաստեղծ կուսակցության կազմում չի լինի նախկին նախագահ Աբդուլլահ Գյուլը, փոխարենը, Դավութօղլուից բացի, կլինեն ԱԳ նախկին նախարար Ալի Բաբաջանը, ժամանակին փոխվարչապետի և ֆինանսների նախարարի պաշտոնը զբաղեցրած Մեհմեդ Շիմշեքը:

Ըստ Թոփրաքի` Դավութօղլուն հայտարարել է. «Էրդողանն ուզում է 35 տոկոս, ուզում է 55 տոկոս` թող վերցնի: Մենք ճանապարհ ենք դուրս գալիս»:

Օրեր առաջ Էրդողանը հայտարարել էր, որ ոմանք, ԱԶԿ-ի տանիքը չհավանելով, այլ հոսանքներ են փնտրում, և այն մարդիկ, որոնք իր հետ քայլել են քաղաքականություն տանող ուղիով, այժմ գնացքից իջել են և այլ գնացք են նստում: