ՄԻՊ-ը ստեղծել է աշխատանքային խումբ՝ քարոզարշավի շուրջօրյա մոնիտորինգ անելու համար

ՀՀ մարդու իրավունքների պաշտպանի գրասենյակը նախընտրական քարոզարշավի շուրջօրյա մոնիտորինգ կիրականացնի: 

Լրագրողների հետ հանդիպման ժամանակ ՄԻՊ Արման Թաթոյանը հայտնեց, որ արդեն ստեղծվել է աշխատանքային խումբ, որի գործունեության մասին հաջորդ շաբաթ մանրամասն  հայտարարություն կարվի:

«Հատուկ ուշադրություն է դարձվելու լրագրողների և դիտորդների իրավունքներին: Համագործակցելու ենք ԿԸՀ-ի, իրավապահ և կառավարության համապատասխան մարմինների հետ»,- հայտնեց նա՝ ակնարկելով, որ իրենց աչքից չեն վրիպելու  ընտրական գործընթացներում կրթական հիմնարկությունների ներգրավման փորձերը: 

Հարցին՝ 12-օրյա ժամկետը բավարա՞ր է քարոզարշավի համար, Թաթոյանը պատասխանեց, որ դա քաղաքական ենթատեքստ պարունակող հարց է, և ինքը դա չի կարող մեկնաբանել: