Շատ դեպքերում կառավարության կողմից քաղաքացիների նամակներին տրվում է «ցրողական» պատասխան. վարչապետ

Այսօր կառավարության նիստում վարչապետ Նիկոլ Փաշինյանն անդրադարձավ քաղաքացիների և նրանց նամակների ընդունելության հարցին: Նա նախ հանձնարարեց նախարարներին, պետական մարմինների ղեկավարներին, մարզպետերին, ինչպես նաեւ անկախ պետական մարմիններին ու Երեւանի քաղաքապետի պաշտոնակատարին` յուրաքանչյուր ամիս առնվազն մեկ անգամ կատարել քաղաքացիների ընդունելություն: Իր աշխատակազմին էլ հանձնարարեց վերահասցեագրված դիմումները մանրակրկիտ քննարկել ու ժամանակին արձագանքել քաղաքացիներին:

Վարչապետի խոսքով` մայիսի 8-ից հետո կառավարությանն ուղղված նամակների թիվն աննախադեպ մեծ ծավալների է հասել, և կա խնդիր` նամակների մշակման գործընթացը դարձնել առավել արդյունավետ: «Շատ դեպքերում քաղաքացիների նամակներին, ցավոք, տրվում է ցրողական պատասխան, ստանդարտ պատասխան: Մի քիչ համակարգային խնդիրներ ունենք, բայց պետք է մտածենք այս ոլորտում արդյունավետությունը բարձրացնելու մասին: Պետք է հաղթահարենք այս ցայտնոտը եւ խստագույնս պահպանենք դիմումներին պատասխանելու ժամկետները»,- ասաց Փաշինյանը: