Ռոհանին պահանջել է, որ Աֆրինը հանձնվի Սիրիայի կառավարական ուժերին. իրանական հեռուստաալիք

Իրանի Իսլամական Հանրապետության նախագահ Հասան Ռոհանին պահանջել է, որ Թուրքիան Աֆրին շրջանը հանձնի Սիրիայի կառավարական ուժերին։ Նման պնդում է առաջ քաշել Իրանի պետական հեռուստաընկերությունը. տեղեկացնում է Ermenihaber-ը:

Ռոհանին նման հայտարարություն է արել ապրիլի 4-ին Անկարայում կայացած` Սիրիայի հարցով Թուրքիա-Ռուսաստան-Իրան գագաթաժողովի ժամանակ։

«Աֆրինում զարգացումներն արդյունավետ կլինեն, եթե չխախտվի Սիրիայի տարածքային ամբողջականությունը։ Աֆրինը պետք է անցնի Սիրիայի կառավարական ուժերի վերահսկողության տակ»,- ասել է Իրանի նախագահը:

Հիշեցնենք, որ Աֆրինն արդեն Թուրքիայի զինուժի վերահսկողության տակ է։ Նախկինում այն գտնվում էր Սիրիայի քրդական ուժերի վերահսկողության տակ։