Մենք միշտ պատրաստ ենք Ադրբեջանի ցանկացած սադրանքի. Շավարշ Քոչարյան

Կառավարության նիստից հետո լրագրողների հետ ճեպազրույցում ԱԳ փոխնախարար Շավարշ Քոչարյանն անդրադարձավ այն հարցին, թե արդյո՞ք պատերազմի է նախապատրաստվում Ադրբեջանը` իրականացնելով զորավարժություններ:

Շավարշ Քոչարյանը նշեց, որ Հայաստանը, բնականաբար, հետևում է այդ ամենին և միշտ պատրաստ է Ադրբեջանի ցանկացած քայլին: «Տվյալ պարագայում տարբեր մեկնաբանություններ կարող են լինել` նախընտրական շրջան է, բայց մենք միշտ պատրաստ ենք նրանց կողմից ցանկացած գործողությունների, ցանկացած սադրանքի»,- ասաց նա:

Ավելի վաղ ադրբեջանական լրատվամիջոցները հայտնել էին, թե Ադրբեջանում անցկացվող մասշտաբային զորավարժություններում կներգրավվեն 25 հազար զինծառայողներ, 250 միավոր տանկեր, հրթիռահրետանային կայանքներ: