Հստակեցնել համայնքներում հողերի նպատակային նշանակության փոփոխության գործընթացը. հանձնարարական

Այսօր կառավարության նիստում վարչապետ Կարեն Կարապետյանը հանձնարարական տվեց հողերի նպատակային նշանակության փոփոխության ընթացքի պարզեցման վերաբերյալ: Համայնքներում, տնտեսական ակտիվությանը զուգահեռ, հաճախակի են դարձել գործարարների կողմից հողերի նպատակային նշանակության փոփոխության դիմումները: Այդ դիմումների քննության ընթացքում ՏԻՄ-երին տրված են լայն հայեցողական լիազորություններ, սակայն հստակ չեն համապատասխան դիմումների մերժման հիմքերը:

Վարչապետը տարածքային կառավարման և զարգացման նախարարին, քաղաքաշինության պետական կոմիտեի նախագահին հանձնարարեց մեկամսյա ժամկետում համատեղ մշակել և կառավարության աշխատակազմին ներկայացնել համայնքներում հողերի նպատակային նշանակության փոփոխության գործընթացը հստակեցնելու և վարչարարությունը պարզեցնելու վերաբերյալ առաջարկություններ: