Ուսանողները վարչապետի հետ համաձայնության չեն եկել. դասադուլը կշարունակվի

Ուսանողների ներկայացուցիչների, վարչապետ Կարեն Կարապետյանի, պաշտպանության նախարար Վիգեն Սարգսյանի և ԿԳ նախարար Լևոն Մկրտչյանի համատեղ քննարկումը տևեց շուրջ երկու ժամ:

Ուսանողներից Դավիթ Պետրոսյանը հանդիպումից հետո լրագրողներին հայտնեց, որ իրենք նախապես այդպես չէին պայմանավորվել հանդիպման ձևաչափի մասին. նախապես պայմանավորվածություն է եղել հանդիպել վարչապետի հետ, սակայն նրա հետ եղել են նաև պաշտպանության և ԿԳ նախարարները:

Վարչապետի, նախարարների հետ ուսանողները համաձայնության չեն եկել. վաղը առավոտյան 9:30-ից շարունակելու են իրենց դասադուլը:

Ուսանողները հայտնեցին, որ վարչապետ Կարապետյանն առաջարկել է գրավոր առաջարկություններ ներկայացնել օրենքի նախագծի ընդունումից հետո: «Մենք գտնում ենք, որ օրենքն այս ձևով չպետք է ընդունվի, հետևաբար` մերժում ենք կառավարության այս առաջարկը»,- ասացին նրանք: