Ինձ վրա ոչ ոք չի կարող ազդեցություն գործել. Սեյրան Օհանյան

Արդեն տեղեկացրել ենք, որ երեք նախկին նախարարներ Սեյրան Օհանյանը, Վարդան Օսկանյանը եւ Րաֆֆի Հովհաննիսյանը համագործակցության հուշագիր են ստորագրել եւ ընտրություններին մասնակցելու են մեկ դաշինքով:

Թեեւ միջոցառման կազմակերպիչները հայտարարեցին, որ ասուլիս չի լինելու, բայց լրագրողներին հաջողվեց մի քանի հարց ուղղել Սեյրան Օհանյանին: Նա, իհարկե, հիմնականում խուսափողական պատասխաններ էր տալիս:

Լրագրողների դիտարկմանը, թե Օհանյան-Օսկանյան դաշինքի աշխատանքները կոորդինացրել է Սամվել Բաբայանը, Սեյրան Օհանյանն արձագանքեց. «Ես ազատ անձնավորություն եմ, ինձ վրա ոչ ոք չի կարող ազդեցություն գործել: Սամվել Բաբայանի հետ մտերիմ հարաբերություններ ունենք»:

Հարցին` գնո՞ւմ է իշխանափոխության, պատասխանեց. «Գնում ենք` իշխանություն ձեւավորելու»:

Ուշագրավ է, որ Սեյրան Օհանյանը հայտարարեց նաեւ, թե Հայաստանում քաղբանտարկյալներ կան, իսկ թե ե՞րբ է բացահայտել, չպարզաբանեց: