Թուրքիայում բազմաթիվ ուսուցիչների հնարավոր է ազատվեն աշխատանքից

Թուրքիայի վարչապետ Բինալի Յըլդըրըմը հայտարարել է, որ այս ուսումնական տարում բոլոր այն ուսուցիչները, ովքեր կասկածվում են Թուրքիայում ահաբեկչական համարվող Գյուլենական շարժման հետ որևէ կապեր ունենալու մեջ, կազատվեն աշխատանքից:

Ըստ AA-ի՝ Յըլդըրըմը տեղեկացրել է, որ այդ մասին արդեն խորհրդակցություններ է անցկացրել ԿԳ նախարարության հետ, և որպես լուծում՝ հանգել են այդ որոշման:

«Բոլոր այն ուսուցիչները, ովքեր կասկածվում են նրանց հետ կապեր ունենալու մեջ, ազատվելու են աշխատանքից: Նրանք նոր ուսումնական տարում չեն կարողանալու պաշտոնավարել»,- հայտարարել է վարչապետը:

Յըլդըրըմի խոսքով՝ իրենք ահաբեկչությունից չեն վախենում: «Այսուհետ ահաբեկչությունը թող մեզնից վախենա: Մեր թիկունքին կանգնած է Թուրքիան, Դիարբեքիրը, 79 միլիոնը: Այսուհետ թող նրանք մտածեն»,- ասել  է նա: