Քաղաքապետարանի պաշտոնյայի կողմից` մահվան հանգեցրած վրաերթից անցել է կես տարի եւ ոչ մի տեղաշարժ

Երևանի քաղաքապետարանի առևտրի վարչության պետ Արման Եդոյանի կողմից Ռուբինյանց փողոցի թիվ 20 շենքի դիմաց հետիոտնին վրաերթի ենթարկելու դեպքից կես տարի անց էական նշանակություն ունեցող համալիր փորձաքննության եզրակացությունները դեռ չեն ստացվել: Այս մասին, yerkir.am-ի գրավոր հարցմանն ի պատասխան, հայտնեցին ՀՀ քննչական կոմիտեի դեպարտամենտի տեղեկատվության և հասարականյության հետ կապերի բաժնից՝ նշելով, որ քննության արդյունքներով կայացվող դատավարական որոշումների մասին լրացուցիչ տեղեկություն կտրամադրեն:

Հիշեցնենք, որ սեպտեմբերի 13-ին` ժամը 22:30-ի սահմաններում, «Լեքսուս» մակնիշի մեքենան Ռուբինյանց փողոցում վրաերթի է ենթարկել 50-ամյա Խորեն Մկրտչյանին, որը տեղում մահացել է: «Լեքսուս» ամենագնացի ղեկին եղել է Երեւանի քաղաքապետարանի առեւտրի վարչության պետ Արման Եդոյանը: Նա այս գործով դեռևս վկայի կարգավիճակում է:

Դեպքի առթիվ նշանակվել է դիակի դատաբժշկական, համալիր՝ դատահետքաբանական, դատաքիմիական և մանրաթելային, ինչպես նաև դատաավտոտեխնիկական փորձաքննություն: Հարուցվել է քրեական գործ՝ ՀՀ քրեական օրենսգրքի 242-րդ հոդվածի 2-րդ մասով: Նախաքննությունը շարունակվում է: