Իրաքը Թուրքիայի փոխարեն Հայաստանից ձեթ կգնի

Իրաքը ծրագրում է կրճատել Թուրքիայից ձեթի ներմուծումը` պայմանավորված երկու երկրների միջև քաղաքական լարվածությամբ:

Ըստ Milliyet-ի՝ Իրաքի առևտրի նախարարության խոսնակը հայտարարել է, որ վարչակազմն աստիճանաբար կդադարեցնի Թուրքիայից ձեթի ներմուծումը, որն անվճար մատակարարվում է բնակչությանը պարենային ապրանքների չափակարգման ծրագրի շրջանակում:

Չի բացառվում, որ տվյալ որոշումը բողոքի նշան է հյուսիսային Իրաքում թուրքական զորքերի տեղակայման դեմ:

Թուրքական Haberler-ի հաղորդմամբ՝ Reuters լրատվական գործակալության հետ զրույցում Իրաքում Հայաստանի դեսպանատան աշխատակիցը հաստատել է տեղեկությունը, սակայն հրաժարվել է այլ մանրամասներ ներկայացնել: