Տնտեսական աճի բարձր տեմպի խոչընդոտները վերացնելու համար կառավարությունը 300 միլիոն դոլար վարկ է վերցնում

Կառավարության այսօրվա նիստում հավանություն տրվեց «ՀՀ և Եվրասիական զարգացման բանկի միջև Եվրասիական տնտեսական ընկերակցության հակաճգնաժամային հիմնադրամի միջոցներից ֆինանսական վարկի տրամադրման մասին» համաձայնագրի կնքմանը:

Նախագիծը գործադիրին ներկայացրեց ֆինանսների նախարար Գագիկ Խաչատրյանը և ասաց, որ վարկով նախատեսվում է Հայաստանին տրամադրել 300 միլիոն ԱՄՆ դոլարի չափով բյուջետային աջակցության վարկ, որը կտրամադրվի երեք մասնաբաժիններով՝ յուրաքանչյուրը 100 մլն ԱՄՆ դոլար գումարով: Վարկի տարեկան տոկոսադրույքը  2.1% է, տրամադրվում է 20 տարի մարման ժամկետով, որից 10 տարին արտոնյալ ժամանակահատվածն է:

Ծրագրում նախատեսված տնտեսական, հարկաբյուջետային և դրամավարկային քաղաքականության միջոցառումների փաթեթն ուղղված է հիմնական կարճաժամկետ և միջնաժամկետ ռիսկերի չեզոքացմանը, ինչպես նաև տնտեսական աճի ավելի բարձր տեմպերի ապահովման գործում խոչընդոտների վերացմանը:

Ծրագրի գլխավոր ուղղություններն են. ա) էներգետիկ հատվածի ֆինանսական կայունության բարձրացում, բ) պետական ֆինանսների կառավարման արդյունավետության բարձրացում, գ) բիզնեսի վարման պայմանների բարելավում: