Ճշտվում է՝ Հարավային Սուդանում կործանված օդանավի անձնակազմի զոհված անդամներից 5-ը հայե՞ր են, թե՞ ոչ

Արդեն հայտնել ենք, որ lifenews-ը, վկայակոչելով Հարավային Սուդանի նախագահի պաշտոնական ներկայացուցչին, հայտնել է, որ Հարավային Սուդանում կործանված բեռնատար օդանավում եղել է 12 ուղևոր և անձնակազմի 6 անդամ` 5 հայ և 1 ռուս:

Yerkir.am-ի հետ զրույցում Հայաստանի Հանրապետության կառավարությանն առընթեր քաղաքացիական ավիացիայի գլխավոր վարչություն մամլո խոսնակ Ռուբեն Գրձելյանը ո\'չ հերքեց, ո\'չ էլ հաստատեց, որ անձնակազմի անդամները հայեր են՝ նշելով, որ տեղեկությունը ճշտվում է:

Նշենք նաև, որ «Ինտերֆաքսն» էլ գրել էր, թե ռուսական բոլոր ավիաընկերությունները հայտնում են, թե ինքնաթիռն իրենց չի պատկանել, հետեւաբար՝ գործակալությունը չի բացառել, որ այն կարող է պատկանել որևէ հայկական ավիաընկերության: Այս կապակցությամբ Ռուբեն Գրձելյանը հայտնեց, որ  ո\'չ ինքնաթիռը, ո\'չ էլ շահագործող ընկերությունը գրանցված չեն Հայաստանում: