Փախստականների ճամբարում Մերկելին սուլոցներով են դիմավորել

Գերմանիայի կանցլեր Անգելա Մերկելը  այցելել է Հայդենաու քաղաքում գտնվող փախստականների ճամբար, որի վրա  մի քանի օր առաջ հարձակում էին գործել ուլտրաաջ ակտիվիստները: Նա արդեն ակտիվիստների գործողություններն անվանել է ամոթալի:

Դրեզդենի մոտ գտնվող Հայդենաու քաղաքում փախստականների ընդունման կենտրոնի բացման դեմ բողոքողների ակցիան վերաճել էր անկարգությունների, որի ընթացքում տասնյակ մարդիկ էին վիրավորվել, այդ թվում` ոստիկաններ:

Չնայած այս միջադեպի առնչությամբ Մերկելի դիրքորոշմանը եւ հայտարարություններին` փախստականների ճամբարում նրան սուլոցներով են դիմավորել եւ վանկարկել «դավաճան»:

Գերմանիայում փախստականի կարգավիճակ ստանալու հայցերն այս տարվա  առաջին 7 ամիսների ընթացքում  ավելացել են 219 հազարով, ինչը 125 տոկոսով ավելի է նախորդ տարվա նույն ժամանակահատվածի համեմատությամբ: