Ընտրություններից առաջ ԼՂՀ են ժամանել ֆրանսիացի դիտորդները

Լեռնային Ղարաբաղում մայիսի 3-ին կայանալիք խորհրդարանական ընտրությունների ընթացքում դիտորդական առաքելություն իրականացնելու նպատակով Ստեփանակերտ են ժամանել մի խումբ ֆրանսիացի դիտորդներ՝ Ֆրանսիայի Ազգային ժողովի պատգամավոր Ֆրանսուա Ռոշբլուանի գլխավորությամբ։

Այս մասին հայտնում է Լեռնային Ղարաբաղի նախագահի մամուլի ծառայությունը:

Այսօր   Բակո Սահակյանն ընդունել է Ֆրանսուա Ռոշբլուանին, ով նաև Ֆրանսիա-Արցախ բարեկամության շրջանակի նախագահն է։ Ըստ պաշտոնական հաղորդագրության՝ հանդիպմանը, որին ներկա էր նաև ԼՂ արտգործնախարար Կարեն Միրզոյանը, քննարկվել են Լեռնային Ղարաբաղի ներքին և արտաքին քաղաքականությանը, Ֆրանսիա-Արցախ համագործակցությանը վերաբերող մի շարք հարցեր:

Նախագահ Սահակյանը երախտագիտություն է հայտնել հյուրերին անկեղծ բարեկամության համար և բարձր գնահատել նրանց դիտորդական առաքելությունը` հավելելով, որ աշխարհի առաջատար պետությունների ներկայացուցիչների նկատառումները կարևոր են Ղարաբաղում ժողովրդավարության զարգացման համար: