Կաթնաղբյուրում բացվել է Հայոց ցեղասպանության զոհերի հիշատակին նվիրված հուշակոթող

Արագածոտնի մարզի Թալինի շրջանի Կաթնաղբյուր գյուղում օրերս բացվել է Հայոց ցեղասպանության զոհերի հիշատակին նվիրված հուշակոթող:

Հարկ է նշել, որ նախաձեռնությունը և ֆինանսավորումը գյուղապետարանի կողմից է եղել, որով խթանվում է նաև մշակութային ծրագրերի զարգացումը ոչ միայն մայրաքաղաքում, այլև մարզերում: Հուշակոթողում օգտագործվել է Մուշեղ Գալշոյանի ամենահայտնի ստեղծագործությններից՝ «Ձորի Միրոյից» մի հատված Էրգրի հողերի մասին, որը հոգեհարազատ է նաև մեծամասամբ մշեցի ու սասունցի կաթնաղբյուրցիներին:

«Աշխարհի ամենամեծ կորուստը մարդու կորուստն է: Մարդու կորուստն անդարձ կորուստ է: Էրգիր ու հողի կորուստ ծանր կորուստ է, բայց հող անմահ է, հող ուրիշ տեր չի ընդունի, հող իր տիրոջ հետ արնակից է ու իր արնակցին կսպասե՛, կսպասե՛ ու օրերից մի օր կհանդիպի: Հողի կորուստ անդարձ կորուստ չէ»: