Դոգի գործով ևս մեկ նախկին ոստիկանի են ձերբակալել

Yerkir.am-ի տեղեկություններով` շորթում կատարելու կասկածանքով հոկտեմբերի 22-ին ձերբակալված` ոստիկանության Չարբախի բաժնի պետի նախկին տեղակալ` Դոգ մականունով Վարդան Ղուկասյանի վերաբերյալ գործն ուղարկվել է ՀՀ Հատուկ քննչական ծառայություն: Այս տեղեկությունը մեզ հետ զրույցում հաստատեց նաև ծառայության մամլո խոսնակ Միքայել Ահարոնյանը: Նշենք, որ գործը գտնվում է ՀՔԾ քննիչ Ռաֆայել Գևորգյանի վարույթում:

Ի դեպ, մեր տեղեկություններով` ՀՀ ՔՕ 182-րդ հոդվածի հատկանիշներով հարուցված այս գործի շրջանակներում ձերբակալվել է նաև Դոգի ընկերը` նախկին ոստիկան Արթուր Մարգարյանը:

Հավելենք նաև, որ այսօր երեկոյան Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը քննության կառնի Վարդան Ղուկասյանին երկու ամսով կալանավորելու` նախաքննական մարմնի միջնորդությունը: