Ավագանու ԲՀԿ-ական անդամը չի ցանկանում խոսել տրանսպորտի գնի բարձրացման մասին

Երևանի ավագանու ԲՀԿ խմբակցության անդամ Թամարա Պողոսյանը, տրանսպորտի սակագների բարձրացման հետ կապված, կարծիք կամ դիրքորոշում արտահայտելուց ձեռնպահ է մնում: Yerkir.am-ի հետ զրույցում նա նշեց, որ ԲՀԿ-ն կսպասի այնքան, մինչև հանձնաժողովը կկայացնի վերջնական որոշում` սակագնի հետ կապված, որից հետո նոր միայն դիրքորոշում կհայտնեն:

Դիտարկմանը, որ անգամ քաղաքապետն ու փոխքաղաքապետը չեն սպասել հանձնաժողովի աշխատանքների ավարտին` նշելով, որ տրանսպորտի սակագինը բարձրանալու է, Թամարա Պողոսյանը պատասխանեց. «Կապ չունի, ես խնդրում եմ` այս պահին ես ձեռնպահ եմ մնում գնահատական տալուց»:

Նա նաև նշեց, որ, որպես քաղաքական ուժ, ԲՀԿ-ն հայտարարություն է արել, որ սկզբունքորեն մերժում է տրանսպորտի սակագնի չհիմնավորված որևէ բարձրացում: Թամարա Պողոսյանի խոսքով` այդ հայտարարությունը ուժի մեջ է, նոր փոփոխություն չկա, նոր հանգամանքներ չկան: