Փաստաբանների պալատի նախագահի թեկնածուն դատապարտում է ոստիկանության վերաբերմունքը

Ոստիկանությունը բողոքի ակցիայի ժամանակ չի պահպանել հավասարության սկզբունքը, և ես, որպես փաստաբան, դատապարտում եմ Արգիշտի Կիվիրյանի նկատմամբ ոստիկանության վերաբերմունքը. այսօր լրագրողների հետ հանդիպման ժամանակ ասաց ՀՀ փաստաբանների պալատի նախագահի թեկնածու Արա Զոհրաբյանը:

Անդրադառնալով սեպտեմբերի 14-ին կայանալիք Փաստաբանների պալատի նախագահի ընտրությանը, Զոհրաբյանը ներկայացրեց իր նախընտրական ծրագիրը, որում փաստաբանը շեշտը  դրել է հանրային պաշտպանության ինստիտուտի զարգացման, փաստաբանների իրավունքների պաշտպանության ու մասնագիտական ունակությունների բարձրացման, ինչպես նաև պալատի կառավարման և գործունեության թափանցիկության ապահովման վրա: Թեկնածուն խոսեց նաև պալատի ձեռքբերումների և առկա խնդիրների մասին` դրական գնահատելով պալատի փաստաբանների ազնիվ մասնագիտական գործունությունն ու տարբեր պետական և դատական մարմինների հետ մութ համագործակցությունից զերծ մնալը: 

«Փաստաբանը պետք է ազնիվ լինի առաջինը ինքն իր հետ, և ես ուրախ եմ, որ Փաստաբանների պալատում կան փաստաբաններ, որոնք կատաղի պայքար են մղում տարբեր պետական մարմիների հետ` վերջիններիս ճնշումներին տեղի չտալով և ստվերային համագործակցության փորձերին արժանի դիմադություն ցույց տալով»,-ասաց բանախոսը: