ՀՀԿ-ի 3-րդ համարն ընկել էր հիշողությունների գիրկը

Նախագահական ընտրությունների վերջակետը դրվել է ապրիլի 9-ին՝ Սերժ Սարգսյանի երդման արարողությամբ. լրագրողների հետ հանդիպման ժամանակ հայտարարեց ՀՀԿ ցուցակի 3-րդ համարը զբաղեցնող` ՀՊՃՇՀ ռեկտոր Հովհաննես Թոքմաջյանը` չցանկանալով ավելին ասել այդ թեմայով:

Նա նշեց, որ ակտիվորեն մասնակցում է Երևանի ավագանու ընտրությունների քարոզարշավին:

Անդրադառնալով Փակ շուկայի խնդրին` Թոքմաջյանն ասաց, որ դրա արտաքին տեսքը չի փոխվելու, սակայն ստորգետնյա աշխատանքները թույլատրելի են:

«Փակ շուկան պետք է վերականգնվի: Ցավով ուզում եմ նշել, որ սա միակ դեպքը չէ, որ ունեցել ենք այս տարիների ընթացքում: Հիշենք Երիտասարդական պալատի շենքը, «Սևան» հյուրանոցը...»,- հայտարարեց նա` կարևորելով Երեւանի պատմության հետ կապված շենքերի ճակատագրի կապակցությամբ քաղաքացիների կարծիքը հաշվի առնելը: