ԿԺԴՀ-ն վերջնագիր է ներկայացրել Հարավային Կորեային

ԿԺԴՀ գերագույն հրամանատարությունը երեկ վերջնագիր է ներակայացրել Հարավային Կորեային` պահանջելով դադարեցնել Փհենյանի դեմ ուղղված թշնամական գործունեությունը. տեղեկացնում է France-Presse-ը:

«ԿԺԴՀ ամբողջ բանակը եւ ժողովուրդը անչափ վրդովված են այդ հրեշավոր հանցագործությունից»,- ասվում է պաշտոնական հայտարարության մեջ եւ պարզաբանվում, որ հանցագործություն ասվածը հարավկորեացի ակտիվիստների ակցիաներն են` կազմակերպված ապրիլի 15-ին` ԿԺԴՀ հիմնադիր Կիմ Իր Սենի 101-րդ տարեդարձի օրը. ակտիվիստները Սեուլում այրել էին նրա, նրա որդու Կիմ Չեն Իրի եւ թոռան` Կիմ Չեն Ընի նկարները:

Վերջնագրի տեքստի համաձայն` նոր վիրավորանքների դեպքում ԿԺԴՀ-ն կհարձակվի իր հակառակորդների վրա առանց զգուշացման, եւ եթե Հարավային Կորեան ցանկանում է երկխոսություն սկսել ԿԺԴՀ-ի հետ, պետք է ներողություն խնդրի վիրավորական գործողությունների համար: