ՀԱՅԿԱԿԱՆ ԺԱՄԱՆԱԿ. 15 տարի են ուզել

Թերթը գրում է, որ մանկապղծության մեջ մեղադրվող Ախթալայի լեռնահարստացուցիչ կոմբինատի սեփականատեր Սերոբ Տեր-Պողոսյանի գործով մեղադրվող դատախազները դատարանին միջնորդել են նրա նկատմամբ` որպես պատիժ, սահմանել 15 տարի ազատազրկում:

Լոռու մարզի ընդհանուր իրավասության դատարանը երեկ ավարտել է Սերոբ Տեր-Պողոսյանի գործով դռնփակ դատաքաննությունը, և դատախազները հանդես են եկել մեղադրական ճառով: 69-ամյա գործարարը մեղադրվում է Ախթալայի ութ անչափահաս երեխաների հետ սեռական հարաբերություններ ունենալու մեջ: Նրան մեղադրանք է առաջադրված ՀՀ քրեական օրենսգրքի 139 հոդվածի («Սեքսուալ բնույթի բռնի գործողությունները») 2-րդ մասի 3-րդ կետով և 3-րդ մասով:

Մեղադրող դատախազ Հովսեփ Սարգսյանը թերթի  հետ զրույցում ասել է, որ  Սերոբ Տեր-Պողոսյանը մեղադրական ճառը լսել է լուռ: Նա պատժի չափը լսելուց հետո չի արձագանքել դրան:

Նոյեմբերի 7-ին Տեր-Պողոսյանը և նրա փաստաբանները պետք է հանդես գան պաշտպանական ճառերով: