400 չվերթ կասեցվել է գործադուլի պատճառով

Ավստրալական ամենախոշոր ավիաընկերություններից Qantas-ը 400 չվերթ է հետաձգել իր աշխատակիցների գործադուլի պատճառով: Ինչպես գրում է Bloomberg-ը, ավելի քան 60 հազար ուղեւոր տուժել է. նրանք ստիպված են տեղափոխվելու համար տրանսպորտային այլ միջոց ընտրել:

Ընկերությունը ստիպված է եղել այս քայլին դիմել, քանի որ ուրբաթ օրը ինժեներները հրաժարվել են սպասարկել թռիչքի պատրաստվող ինքնաթիռները: Չորս ժամ դադարեցնելով իրենց աշխատանքը` նրանք պահանջել են աշխատավարձերի բարձրացում, ինչպես նաեւ աշխատանքային պայմանների բարելավում:

Գործադուլավորները նշել են նաեւ, որ ընկերությունը չի կատարում իրենց հետ կնքած պայմանագրի կետերը: