Թագավորին առանց թագի չեն ճանաչում

Շվեդիայի թագավոր Կառլ Գուստավին եւ նրա տիկնոջը` Սիլվիային, թույլ չեն տվել մտնել գերմանական Լադենբուրգ քաղաքի ռեստորանը, քանի որ վերջինիս տիրուհին չի ճանաչել «երկնագույն արյամբ» զույգին: Արդյունքում համեստ միապետը բավարարվել է շուկայի հրապարակում վաճառվող պիցցայով. տեղեկացնում է France Presse գործակալությունը:

Միջադեպը տեղի է ունեցել անցած հինգշաբթի: «Ոսկե աստղ» ռեստորանի տիրուհին լրագրողներին պատմել է, որ ռեստորանում հարսանիք է տոնվել, ազատ տեղեր չեն եղել: «Հավաքարար եք, թե` թագավոր, միեւնույն է, ազատ սեղաններ եւ բավարար աշխատուժ խոհանոցում չունեինք»,- ասել է նա` խոստովանելով նաեւ, որ թագավորին ու թագուհուն չի ճանաչել առանց թագի:

Ռեստորանի տիրուհին եւ նրա ամուսինը, որը նույն ռեստորանի խոհարարն է, պատրաստվում են ներողություններով նամակ ուղարկել Շվեդիա: «Մենք ուրախ կլինենք նրանց ընդունել մեկ այլ անգամ»,- ասել են նրանք: