Իրական գնաճը շատ մեծ է

Հայաստանում հարուստների համար գնաճն ավելի ցածր է, քան սոցիալապես ավելի անապահովների համար: Այսօր լրագրողների հետ հանդիպման ժամանակ կառավարման փորձագետ Հարություն Մեսրոբյանը նշեց, որ, օրինակ, նախորդ տարի հաշվարկված գնաճի պաշտոնական ցուցանիշը 9.4 է եղել: Սակայն այն հաշվարկելիս հաշվի է առնվել 470 ապրանքատեսակ:

Իսկ ահա պատկերը փոխվում է, երբ հաշվի է առնվում մի նրբություն. սոցիալապես անապահով խավն այդ 470 ապրանքատեսակը չի գնում: Հ. Մեսրոբյանը նշեց, թե իր հաշվարկներով գնաճն ավելին է:

«Երբ ես վերցրեցի 40-60 ապրանքատեսակ, որոնք ամենաշատն են օգտագործվում սոցիալապես անապահով մարդկանց կողմից` գումարած կոմունալ վճարումները, գնաճը անցավ 25 տոկոսը»,- նշեց փորձագետը` հավելելով, որ այս իրավիճակն էլ բերում է սոցիալական բեւեռացվածության: