ԱՄՆ-ը դեմ է Պաղեստինի միավորմանը

ԱՄՆ-ը կվերանայի Պաղեստինյան ինքնավարությանը տրամադրվող ֆինանսական օգնության ծավալները, եթե ՀԱՄԱՍ շարժման ներկայացուցիչներն ընդգրկվեն պաղեստինյան անցումային կառավարության կազմում. հայտարարել է ԱՄՆ պետդեպարտամենտի մամուլի քարտուղար Հայդի Բորնկե Ֆուլթոնը:

«Մեր ներկայիս օգնությունը կարեւոր ներդրում է ապագա անկախ Պաղեստինի պետական ինստիտուտների ստեղծման գործում: Գումարը Սպիտակ տունը հատկացնում է Պաղեստինյան վարչակազմի ղեկավար, ՖԱԹՀ շարժման առաջնորդ Մահմուդ Աբասի ստեղծած կառավարությանը: Մինչդեռ ՀԱՄԱՍ-ը Վաշինգտոնն ընդգրկել է ահաբեկչական կազմակերպությոնների ցուցակում»,- ասել է նա:

Պաղեստինյան ՖԱԹՀ եւ ՀԱՄԱՍ շարժումները պայմանավորվել են համատեղ կառավարություն ստեղծել, նաեւ Պաղեստինում համընդհանուր ընտրություններ անցկացնել: Նախնական համաձայնագիրը ստորագրվել է միջնորդ Եգիպտոսի մայրաքաղաք Կահիրեում: