Մինսկը փակում է ԵԱՀԿ գրասենյակը

Մինսկում ԵԱՀԿ գրասենյակը փակելու որոշումը վերջնական է. այսօր հայտարարել է Բելառուսի ԱԳՆ մամուլի քարտուղար Անդրեյ Սավինիխը:

Նա նաեւ հավելել է, որ մի շարք պետություններ փորձել են օգտագործել գրասենյակը Բելառուսի վրա ուժային ճնշում գործադրելու համար` կապված դեկտեմբերին երկրում անցկացված նախագահական ընտրությունների եւ Ալեքսանդր Լուկաշենկոյի` ընդդիմության դեմ իրականացրած գործողությունների հետ:

ԵԱՀԿ առաքելության գրասենյակը փակելու որոշումը Բելառուսը կայացրել էր դեկտեմբերի 31-ին: Մարտի 31-ին լրացել է առաքելության տեխնիկական փակման եռամսյա ժամկետը:

ԵԱՀԿ գործող նախագահ, Լիտվայի արտգործնախարար Աուդրոնյուս Աժուբալիսը ապրիլի 5-ին հայտարարել է, որ Բելառուսն ավելի ու ավելի է մեկուսացնում իրեն: