2010-ն ամփոփեց նաեւ Բնապահպանության նախարարությունը

ՀՀ բնապահպանության նախարար Արամ Հարությունյանը, ամփոփելով 2010-ը, նշեց, որ ընթացիկ տարում ամենակարեւոր ձեռքբերումն է եղել կենդանիների եւ բույսերի «Կարմիր գրքի» հրատարակումը, որը ԽՍՀՄ ժամանակահատվածից հետո առաջին լույսընծայումն է:

«2010թ. եղել է ծանր աշխատանքային տարի, եւ կարծում եմ` կարողացանք թիմային աշխատանք տանել բնապահպանության ոլորտում: Ճիշտ է, եղել են նաեւ բացթողումներ, բայց չի սխալվում նա, ով չի աշխատում»,- ասաց պարոն Հարությունյանը:

ՄԱԿ-ի «Կլիմայի փոփոխության շրջանակային կոնվենցիայի 16-րդ կողմերի կոնֆերանս»-ում իրազեկության բարձրացման իրականացված աշխատանքների ճանաչման եւ մաքուր զարգացման մեխանիզմում մասնակցության համար պարգեւատրվել է ՀՀ Բնապահպանության նախարարությունը:

2010թ. Բնապահպանության նախարարության կողմից իրականացված աշխատանքների հիմնական ուղղություններն են եղել բնապահպանության ոլորտի գերակա խնդիրների եւ միջոցառումների կատարման ապահովումը: