Հորմուզի նեղուցը որևէ կապ չունի ԱՄՆ-ի հետ, դրանից օգտվում է ամբողջ աշխարհը․ Իրանի գերագույն առաջնորդի խորհրդական

Իրանի գերագույն ղեկավարի ավագ ռազմական խորհրդական Մոհսեն Ռեզային հայտարարել է, որ Հորմուզի նեղուցի օգտագործման հարցերում Միացյալ Նահանգները որևէ դեր կամ առնչություն չունեն, քանի որ այն գտնվում է Իրանի և Օմանի տարածքային ջրերում։ Նրա խոսքերը փոխանցում է Mehr գործակալությունը։

Ռեզային ընդգծել է, որ Հորմուզի նեղուցից օգտվում են աշխարհի բոլոր երկրները, սակայն դա չի նշանակում, որ Վաշինգտոնը կարող է միանձնյա ազդեցություն ունենալ դրա ճակատագրի վրա։

«Հորմուզի նեղուցը որևէ կապ չունի ԱՄՆ-ի հետ։ Դրանից օգտվում է ամբողջ աշխարհը, սակայն ոչ մի երկիր թույլ չի տա, որ Ամերիկան միանձնյա միջամտի դրա ճակատագրին»,- հայտարարել է նա։

Խորհրդականի խոսքով՝ Հորմուզի նեղուցը ռազմավարական առանձնահատուկ նշանակություն ունի, քանի որ այն հանդիսանում է Պարսից ծոցի մուտքը, այլ ոչ թե պարզապես երկու ծովերի կամ օվկիանոսների միջև գտնվող սովորական ջրային ուղի։

«Ինչո՞ւ է ԱՄՆ-ն ցանկանում Հորմուզի նեղուցով մտնել Պարսից ծոց։ Հենց սա է պատճառը, որ մենք կասկածանքով ենք վերաբերվում ամերիկյան հակառակորդ կառավարությանը, քանի որ Իրանը գտնվում է ԱՄՆ-ի հետ առճակատման մեջ»,- հավելել է Ռեզային։

Նրա այս հայտարարությունը հնչել է Հորմուզի նեղուցի շուրջ աճող լարվածության պայմաններում, որը համարվում է նավթի համաշխարհային փոխադրումների կարևորագույն ուղիներից մեկը։

Վերջին շաբաթներին Իրանը մի քանի անգամ հայտարարել է, որ պատրաստ է վերահսկել տարածաշրջանում նավերի տեղաշարժը, ինչպես նաև նախազգուշացրել է ԱՄՆ-ին և նրա դաշնակիցներին հնարավոր ռազմական ճնշման հետևանքների մասին։