Գրենլանդիան պետք է լինի ԱՄՆ-ինը․ Դոնալդ Թրամփ

Գրենլանդիան պետք է լինի ԱՄՆ-ինը․ այն մեզ հարկավոր է։ Նման հայտարարությամբ է հանդես եկել ԱՄՆ նախագահ Դոնալդ Թրամփը Սպիտակ տանը լրագրողների հետ զրույցում։

«Մեզ Գրենլանդիան պետք է միջազգային անվտանգության համար: Այն մեզ պետք է, այն պետք է մերը լինի: Այն պաշտպանական և հարձակողական դիրք ունեցող կղզի է, այն է, ինչ մեզ անհրաժեշտ է», - ասել է Թրամփը:

Թրամփը նշել է, որ Գրենլանդիայի մերձակայքում նավարկում են ռուսական և չինական նավերը, ուստի ԱՄՆ-ն ևս պետք է այնտեղ լինի։

«Եթե մենք այնտեղ չլինենք, չենք կարողանա ապահովել ազգային կամ միջազգային անվտանգությունը», - ընդգծել է նա։

Միևնույն ժամանակ ԱՄՆ նախագահը վստահ չէ, թե արդյոք գրենլանդացիները պատրաստ են լինել Միացյալ Նահանգների քաղաքացիներ, բայց վստահ է, որ պետք է համոզել նրանց։

Ավելի վաղ հայտնի էր դարձել, որ ԱՄՆ փոխնախագահ Ջեյ Դի Վենսն այս շաբաթ կայցելի Գրենլանդիա, մասնավորապես՝ գնահատելու անվտանգության ոլորտում իրավիճակը։ Վենսը բացատրել է, որ մտադիր է հանդիպել ամերիկացի զինվորականների հետ, որոնք տեղակայված են Գրենլանդիայի բազայում, ինչպես նաև ստուգել, ​​թե ինչպես է անվտանգության իրավիճակն այնտեղ: